KALIBO, Aklan—Sangka ginadudahan nga sink hole ro nag-higup sa 15 anyos nga si Jhuros Flores rason nga owa nakita ro anang eawas.
Raya ro ginpahayag ni Dr. Romeo Lorenzo, mental health professional ag psychology professor matapos nga aktwal nga gin-agtunan ro lugar nga anang gin-eumsan sa aklan river nga sakop it brgy. polo, banga ag nagpatigayon it pag-estudyo sa movement it tubi ag kabilugan nga sitwasyon it suba.
Nagapati si Dr. Lorenzo nga kon simpleng pagkaeumos ro natabu sa biktima hay mabahoe ro posibilidad nga nag-eutaw ro anang eawas maskin pa nga gin-anud raya hasta sa dam sa Brgy. Sigcay sa nasambit nga lugar.
May nakita sigon imaw nga naga-lilo nga tubi nga may radius nga 3 to 4 meters ag nagahigup paubos nga sangka senyales nga may buho sa ubos rason nga nagdaeum ro tubi.
May nataeupangdan man imaw nga bato nga may sharp curve nga suno sa mga tumandok hay kweba sa idaeum it tubi.
Madumduman nga nauna eon nga nagsurender ro mga volunteer divers sa pag-eunip sa pag-usoy sa eawas it binatilyo bangud sa indi matakuran nga pwersa ukon pressure it tubi nga matsa nagapang-higup.
Samtang, agud nga malikawan nga may matabu eon man nga insidente it pagka-eumos sa lugar, ginsuhestiyon ni Dr. Lorenzo nga magbutang it nagakaigo nga precautionary sign boards nga indi pwedeng magpaligos ukon mag-eusong sa nasambit nga parte it suba.
Dugang pa nga tiempo eon agud nga magbutang it tulay sa lugar bangud nga masyadong delikado nga mag-agi sa dam bangud nga maeumot kamana man nga bukon it eowas nga maggamit it baesa kapin kon mataas ro tubi sa suba.
Kinahangean man sigon nga estudyuhan ro portion it suba agud nga makumpirma kon may sink hole gid man ukon may kweba pinaagi sa paggamit it deep sea underwater cable nga may camera.
