KALIBO, Aklan—Nagpangayo it pasaylo ro pamunuan it Bureau of Internal Revenue ukon BIR-Aklan sa mga taxpayers nga owa na-satisfy sa andang serbisyo .
Aminado si officer in charge ag hepe it assessment section it BIR Roselyn Satajo nga masyadong kueang ro andang mga tawuhan agud nga insigidang ma-akomodar ro tanan nga mga nakikipag-transaksyon sa andang taeatapan.
Owa sigon sanda it ideya sa napabalita nga may pilang taxpayers nga nagapila eon it umpisa alas-2:00 it aga-aga agud nga makabo-oe it transaction number sa gwardiya.
Hinyu nana nga kon mahimo hay mag-agto sa andang opisina it alas-7:30 it agahon bangud nga alas-8:00 it agahon pa naga-umpisa ro andang transaksyon, kun sa siin, nagapatuman sanda it “first come, first serve basis”.
Ginasunod man suno kana it andang opisina ro “No Lunch Break Policy” agud nga mapadasig ro trabaho.
Nauna eon nga nagpaabot it reklamo sa Bombo Radyo si Mrs. Lenebeth Sualog nga taga Isla it Boracay angot sa pagkadismaya sa gina alegar nga masyado kahinay nga transaksyon sa BIR nga nagaresulta sigon sa backlog rason nga owa natapos ro anang transaksyon.
Suhestiyon nana nga magtaeana it empleyado nga maga-usisa sa mga dokumento agud nga indi eon magpila it mabuhay ro mga kliyente nga may mga kueang pa nga requirements ag magtaeana it lamesa para sa mga may maabu nga papeles nga ginabuytan.
