Nagakabaeaka ro Bureau of Internal Revenue (BIR) nga inde maabot ro target nga tax collection makaron nga dag-on kasunod it nagapadayon nga epekto it coronavirus disease ukon COVID-19.
Raya hay matapos nga bumagsak ro tourism industry sa isla it Boracay kasunod it kawad-an it mga turista nga nagabakasyon bangud sa travel restriction nga ginpatuman it gobyerno sa mainland China kaeakip ro administrative region nga Hong Kong ag Macau kamana man sa South Korea partikular sa North Gyeongsang Province kon sa siin nahamtang ro Daegu City nga imaw ro may pinakamaabong kaso it nagkasakit it COVID-19.
Suno kay Nelia Demalata, revenue district officer it BIR-Aklan, ko 2019 sigon hay nag-exceed ro andang collection it kapin sa P250 milyon ukon 14.29 percent rason nga nakaabot sanda it P1.98 bilyon halin sa target collection nga P1,748,000,000.
Sa unang daywang buean it presenteng dag-on hay naabot pa nanda ro monthly target collection apang bukon eon it mataas kaparehas sa andang ginaeauman bangud nga sumobra eamang raya it 6.72 percent.
Ginpahayag dugang nga duda sanda kon magataas pa ro andang tax collection makaron nga dag-on kaparehas ko 2019 kon sa siin rank number sa bilog nga rehiyon ro Aklan ag pang lima sa bilog nga nasyon nga may pinakamataas nga tax collection sa bilog nga dag-on.
