KALIBO, Aklan—Uman eon man nga gintaw-an it pagkilaea it Philippine Red Cross (PRC) Aklan Chapter ro Bombo Radyo Kalibo bangud sa “Dugong Bombo…A Little Pain…A life to Gain” nga nauna eon nga ginbansagan nga bloodiest nga blood letting activity it Bombo Radyo philippines ag Star FM.
Raya hay matapos nga kada dag-on kat owa pa nagpanaeasa ro pandemya tuga it covid 19 hay drum-drum it dugo ro natigayon nga matipon sa sueod eamang it sang adlaw sa bilog nga nasyon halin sa mga pumueuyu nga nagasabat sa panawagan nga mag donate it dugo.
Kada buean it nobyembre hay dueueungan nga ginapatigayon ro aktibidad sa 31 nga mga probinsiya nga may una nga estasyon it Bombo Radyo ag Star fm.
Ko dag-on 2020, agud nga makabulig gihapon nga makatipon it dugo hay nakipag-alyansa ro bombo radyo kalibo sa nagkaeain-eain nga local government units agud nga mapabaskog ro blood letting activity sa tunga it pandemya.
Sa ginpatigayon nga Annual Blood Donors Recognition, mismong si SP member Emmanuel soviet Russia Dela Cruz, chairman it board of directors ag Mary Joe Galleon, chapter administrator ro nagtau it certificate sa Bombo Radyo Kalibo bilang pagkilaea sa madinaeag-on nga promosyon kara sa National Voluntary Blood Services Program agud nga masiguro nga makaangkon it bastante ag eowas nga supply it dugo sa probinsya it Aklan sa tunga it pandemya.
Nauna kara, ginpasidunggan man it PRC ro mga LGU’s, non-local government units ag iba pang grupo nga nagapatigayon man it kaparehong aktibidad.
