KALIBO, Aklan — Padayun nga paborito nga agtunan it mga dumueuong nga turista ro Boracay, Palawan, Cebu ag Bohol sa pihak nga haeos daywang dag-on nga ginsaraduhan ro nasyon sa mga international travelers.
Raya ro ginpahayag ni Tourism Congress of the Philippines (TCP) President Jose Clemente III.
Umpisa Pebrero 10, uman nga magabaton ro Pilipinas it mga fully vaccinated nga turista halin sa 157 nga visa-free countries.
Ko nagtaliwan nga domingo, kaeabanan sa mga demands hay nagahalin sa North America, Europe, ag pilang parte it Middle East.
Suno kay Clemente nga raya hay posibleng tuga it “liberal travel restrictions” sa nasambit nga mga rehiyon, kabaliskaran sa mas strikto nga protocols nga ginapatuman sa mga nasyon sa Asya nga tinamaan it Omicron variant it COVID-19.
Nagaeaum si Clemente nga pagahaeugaan it mga nasyon sa Asya ro andang pandemic restrictions sa oras nga makita ro pagnaba it trend sa Omicron cases.
Pila sa mga ginapasugtan nga magsueod sa nasyon umpisa Pebrero 10 hay ro mga biyahero halin sa South Korea, Australia, Canada, Japan, Malaysia, Singapore, United Kingdom, United States, ag Germany nga makabig man nga top source markets it Pilipinas.
