MALAY, Aklan — Napas-eawan sa gihapon nga makabo-oe it suporta halin sa Sangguniang Panlalawigan it Aklan ro ginaproponer nga pagpatindog it tulay paagto sa kilaeang isla it Boracay it San Miguel Corporation .
Raya hay kasunod it ginpatigayon nga public hearing it Sangguniang Bayan it Malay, adlaw it Biyernes, Pebrero 13, 2026, kaibahan ro 20th Sangguniang Panlalawigan agud nga repasuhon ro proposed resolution ni SB Member Christine Hope Pagsuguiron angot sa hugut nga pagpamaeabag it mga taga banwa it Malay sa planong Boracay Bridge Project.
Mag-eowas sa mga LGU officials, gintambungan man raya it transport ag business group representatives ag iba pang sektor.
Angot kara, ginpahayag ni SP member Apolinar Cleope nga mabahoe ro andang pagpati nga ro proyekto hay magatuga eamang it mabahoe nga peligro sa Boracay kaibahan ro posibleng kahalitan sa mga yamang-dagat, pag-grabe it coastal erosion, ag pagkasamad it mahuyang eon nga eco-system it isla.
Ginapanan-aw nga maka apekto man raya sa pangabuhian ag turismo bangud sa posibilidad nga iga-monopolize it San Miguel Corporation ro aspeto it transport infrastructure, kun sa siin ro Caticlan Airport sa mainland Malay hay ginapadaeagan man it nasambit nga kompaniya.
SP member Apolenar Cleope sa anang pagpahayag.
Samtang, gindugang pa ni SP Cleope nga kueang man sigon ro proyekto it nagakaigo nga konsultasyon sa mga lokal nga residente ag stakeholder, kun sa siin, maskin sanda nga mga miyembro it provincial board hay owa nakasayod sa master plan kara ag kon may mga dokumento raya nga ginabuytan.
Kon pasugtan sigon ro proyekto hay matsa gingisa kita sa aton nga kaugalingon nga mantika bangud nga ro tulay nga igapatindog hay makabig nga toll bridge nga nagakahueugan nga ro tanan nga mga nagagamit kara hay magabayad.
Madumduman nga dati eon nga nagpahayag it pagpamaeag sa proyekto ro Aklan provincial government.
Ro nasambit nga public hearing hay kaparte it proseso agud nga mapamatian ro pulso it publiko antes nga maghimo it pinal nga desisyon ro mga lokal nga opisyal.
