KALIBO, Aklan— Ginkuwestyon it mga residente ag turista ro ginpabugae it Boracay Inter-Agency Task Force (BIATF) nga improvement ag development sa nagapadayun nga rehabilitation effort it gobyerno sa isla it Boracay.
Raya hay kasunod it naexperiensiyahan nga gutter deep nga pagbaha sa mga nagapangunang karsada, paeamasyaran ag pilang lugar sa isla matapos ro haeos ap-at nga oras nga owa it untat nga pag-uean.
Nagpaguwa it andang sintemyento ro mga pumueuyu ag motorista bangud sa mabudlay nga maeapok ag lubak-lubak nga karsada.
Nagpabutyag man it pagkadismaya ro pilang mga dumueuong nga turista bangud nga maskin ro mga lugar nga pirmeng ginapamasyaran hay ginbaha man.
Nauna kara, ginpabugae ni Boracay Inter-Agency Rehabilitation Management Group (BIARMG) general manager Natividad Bernandino, nga maabu eon sigon sanda nga nahimo nga pagbag-o sa mala-paraisong tourist destination umpisa nga ginpatigayon ro paglimpyo ag rehabilitasyon.
Nasayuran nga on-track makaron ro Phase II it road improvement sa pagpanguna it Department of Public Works and Highways (DPWH) ag ro pagpatigayon it mga drainage canal sa pagdumaea it Tourism Infrastructure and Enterprise Zone Authority (TIEZA).
