Boracay, ginpasidunggan sa Japan Tourism Award

KALIBO, Aklan—Ginpasidunggan ro isla it Boracay sa prestihiyosong Japan Tourism Awards bilang pagkilaea sa ginhimong tikang it gobyerno kat ginpaidaeom sa an-om nga bueang paglimpyo ag rehabilitasyon ro isla.

Si Department of Tourism Sec. Bernadette Romulo-Puyat ro nagbaton it Excellent Partner Award sa ginpatigayong opening ceremony it Tourism Expo Japan sa sangka hotel sa Osaka.

Naging basehan it award-giving body ro aktibong partisipasyon it Boracay Inter-Agency Task Force nga ginpangunahan it DoT, Department of Environment and Natural Resources (DENR) ag Department of the Interior and Local Government (DILG) sa ginhimong rehabilitasyon agud maibalik ro dating kaanyag it isla ag pagresolba sa problema sa polusyon.

Eubus nga ginkalipay it task force bangud nga maskin nagapadayon  pa ro rehabilitasyon sa isla kapin eon sa road widening ag pagbutang it drainage ag sewerage system hay nakikita eon ro naging bunga kara.