KALIBO, Aklan–Ginklaro makaron it pamunuan it Boracay Inter-Agency Rehabilitation Management Group (BIARMG) pinaagi it DENR-EMB Region 6 ro malisyosong artikulo ag litrato angot sa pag-eotaw it uman it eomot sa baybayon it isla it Boracay nga makaron hay nagakalhit sa nagkaeain-eain nga social media platforms.
Sandig sa ginpaguwa nga statement ni Martin Jose V. Despi, General Manager it BIARMG nga regular sigon sanda nga nagapatigayon it quality testing sa strategic stations sa bilog nga isla.
Base sa official water quality report, ro fecal coliform level sa front beach hay 8mpn/100ml ko January 2022 ag 11mpn/100ml ko February 2022.
Ginakumpirma sigon it resulta nga ro tubi sa Boracay sa front beach hay naabot kara ro Water Quality Standards nga eowas nga mapaligsan at 100mpn/100ml.
Ro presensya it mga eomot hay ginakabig nga sangka natural phenomenon nga nagaeotaw kada summer period sa nagkaeain-eain nga parte it Boracay.
Ginpasiguro it ahensya nga raya hay bukon it toxic ag uwa it maskin anong paeag ukon halit nga igatuga sa mga nagapaligos nga pumueoyo ukon maging sa mga turista nga nagadagsa eon makaron sa sikat nga isla.
Sa kamatuoran sigon ro volume it eomot hay natural nga nagakaduea makataliwan ro daywang dominggo.
Naobserbahan man sigon it BIARMG ro presensya it mga eomot sa Carabao Island, ro remote ag commercially undeveloped nga isla maeapit sa Boracay.
Uman nga ginpasiguro it ahensya nga ro tubi sa Boracay hay malimpyo ag eowas nga mapaligsan.
