KALIBO, AKLAN — Sa sueod eamang it ap-at nga buean makaron nga dag-on hay nag-abot eon sa P21-billion ro kita ko isla it Boracay sa andang tourism receipts.
Suno kay Caticlan jetty port administrator Niven Maquirang, base sa ginpaguwa nga report it Aklan Provincial Tourism Office (APTO), kapin sa P14-billion ro tourism receipts halin sa mga foreign tourists ag overseas Filipino workers (OFW) samtang nag-abot man sa P6-billion ro kita sa mga lokal nga turista.
Umpisa ko Enero hasta it Abril it rayang dag-on hay kapin sa 744,000 ro tourist arrivals sa Boracay mas mataas it 10.84 percent kumpara ko 2016 sa kaparehong period nga nag-abot sa 671,000.
Bumuhos makaron nga dag-on ro foreign tourists nga nag-abot sa 364,000 samtang ro local tourists hay kapin sa 360,000 ag ro OFWs hay masobra sa 20,000.
Nakalista it pinakamataas nga tourist arrivals ko buean it Abril nga nag-abot sa 233,000 kasunod it Semana Santa, summer vacation ag selebrasyon it beach party nga LaBoracay.
