KALIBO, Aklan—Padayun nga naka-experiensiya it manaba nga tourist arrivals ro isla it Boracay bangud sa COVID-19 pandemic eabi eon ro pagpanaeasa it Omicron variant sa nasyon.
Suno kay Malay Tourism Officer Felix Delos Santos nga maskin nga may naga-aeabutan nga mga turista, apang masyadong manaba ro numero kumpara sa nailistang bisita ko buean it Disyembre.
Umpisa nga uman nga gin-require suno kana ro RT-PCR test result sa mga non-Aklanon tourists hay naga-average eon lang sa 300 to 400 ro kada adlaw nga tourist arrivals nga masyadong maeayo sa 4,000 hasta 6,000 per day ko nagtaliwan nga buean.
Bangud kara, uman nga naapektuhan sigon ro mga accommodation establishments ag tourism enterprises kamana man ro iba pang mga trabahador bangud sa pagsarado it pila sa mga raya samtang ro iba hay gintag-uran ro oras it andang operasyon ag sa gabi-i eamang nga nagabukas.
Mag-eowas kara, gindugang pa ni delos santos nga apektado man ro operasyon it mga water sports activities bangud nga 30 hasta 50% eamang ro ginapasugtan nga capacity sa idaeum it sueundanan sa Alert Level 3.
Sa pihak nga parte, ginkalipay sigon it provincial government nga owa eon sanda it may nadakpan nga naga-peke it swab test result.
Umpisa Enero 1 hasta 23, ro tourist arrivals hay naga-abot sa 30,605 kun sa siin kaabuan kara hay naghalin sa NCR, Calabarzon ag Western Visayas.
Nagaeaum sanda nga bangud sa napabalita nga pagnaba eon it kaso it COVID-19 sa Metro Manila hay uman nga magapanumbalik ro kabaskog it tourism industry sa isla sa masunod nga mga inadlaw.
