KALIBO, Aklan—Gin-insister ni Aklan 2nd District Sangguniang Panlalawigan member Jay Tejada nga dapat taw-an it national government it nagakaigo nga respito ro lokal nga otonomiya it banwang Malay.
Suno kay Tejada, may naga-eksister nga moratorium ro lokal nga gobyerno kun siin owa anay ginapasugtan ro operasyon it casino sa Boracay sa sueod it 15 anyos.
Raya hay kasunod it pahayag ni Pangueong Rodrigo Duterte nga plano karang patindugan it casino sa isla bangud sa kakueangan it pondo it gobyerno.
Nagpanindugan si Tejada nga sarang maka-survive it Boracay maskin nga owa it naga-operate nga casino bangud kilaea ro isla sa bilog nga kalibutan bilang environmentally sound ag family oriented.
Gin-engganyo man kara ro mga pumueoyong Aklanon nga maghugpong ag protektahan ro kultura nga indi magpromote it gambling ukon sugae.
Sa pihak kara, nagapati man ro opisyal nga konektado ro nasambit nga desisyon it pangueo sa ginaduso nga Boracay Island Development Authority ukon BIDA Bill sa idaeom it Government Owned and Controlled Corporation ukon GOCC.
Samtang, sa pihak nga parte, bukas man si Punong barangay Nixon Sualog it Brgy. Manoc-manoc sa isla it Boracay engkaso nga mapasugtan ro konstruksyon it casino sa anang nasakupan.
Suno kana, dapat anay nga mag-agi raya sa public consoltation ag may nagakaigo nga permiso halin sa Philippine Amusement and Gaming Corporation (PAGCOR).
Ginklaro man kara nga owa pa it anumang dokumento nga nag-abot sa anang opisina angot sa nasambit nga proposisyon.
Sa kamatuoran suno kana, may ap-at eon nga naga-operate nga casino sa Boracay nga nagabaton eamang it mga dumueoong turista.
