KALIBO, Aklan—Sa atubang it pagtinguha it gobyerno nga uman nga makabangon ro industriya it turismo sa nasyon, ginkalipay it Department of Tourism ukon DoT ro pagkilaea it Condé Nast Traveler.
Nakaibahan ro Boracay sa tatlong isla sa Pilipinas sa mga nagapangunang agtunan nga isla ko 2021 base sa dag-unan nga readers’ choice awards it nasambit nga travel magazine.
Sa kabilugan nga 85 nga mga destinasyon nga kaibahan sa listahan, ro surfing haven nga Siargao Island ro ginkilaea bilang top favorite sa Asya, samtang naangkon it sikat nga Palawan ag Boracay ro ikatlo ag pang-waeo nga pwesto.
Nauna eon nga ginpahayag ni Malay Tourism Officer Felix Delos Santos nga ginatinguhaan makaron it DoT ag lokal nga gobyerno it Aklan nga maabot ro herd immunity sa mga nabakunahan nga tourism workers ag mga residente sa Boracay agud nga mapahauman it husto ro international leisure travel sa oras nga boe-on eon ro restrictions tuga it covid 19 pandemic.
Hugot sigon nga ginapatuman sa tanan nga mga tourism establishments sa isla ro health and safety protocols.
Sa pihak nga parte, ro tatlong iba pa nga ginkilaea nga world favorites sa Asya hay ro Raja Ampat Islands sa Indonesia nga nagpangaywa, Phi Phi Islands it Thailand nga pang-siyam nga pwesto ag Phuket nga pang-napueo.
Sa pihak nga parte, ro Pilipinas hay ika-20 nga pwesto sa listahan it Condé Nast Traveler it Top Countries in the World nga nay score nga 91.63.
Ro resulta hay base sa gintipon nga feedback it CNT halin sa andang masobra sa 800,000 nga mga readers sa bilog nga kalibutan.
