Kalibo Aklan —–Nagakabaeaka ro sangka residente matapos nga mataeupangdan ro mga giltak sa tulay sa may circumferential road sa Barangay Tigayon, Kalibo.
Sangka concerned citizen nga nakilaea kay Jovito Crispino it nasambit nga lugar ro nagdangop sa Bombo Radyo matapos nga makita ro mga giltak samtang nga naga-jogging sa kahabaon it nasambit nga tulay.
Ginatantiya suno kana nga mga daywang tudlo ro maka-igo sa giltak.
Maka-alarma suno kana ro nasambit nga sitwasyun bangud nga kaeabanan nga mga naga-agi sa lugar hay mga delivery truck .
Nasayuran nga ro nasambit nga lugar hay pormal eamang nga ginbuksan ko buean it Enero nga ginpangunahan ni Department of Public Works and Highways (DPWH) Sec Mark Villar.
Ro Kalibo Bridge 3 nga may haba nga 770 meter hay nauna eon nga ginbansagan nga pinakamahaba nga tulay sa Western Visayas.
Gintinguhaan man it Bombo Radyo Kalibo nga makipag-angot sa DPWH Aklan, ag ginpasiguro nga paga-inspeksyunon ro nasambit nga lugar .
