KALIBO, Aklan — Gina-imbestigahan eon it Kalibo Municipal Police Station ro makabig nga brutal nga fraternity initiation nga naboe-an it video, kun sa siin grabeng ginabugbog ro sangka babaye nga estudyate it mga kapareho man nana nga babayeng estudyante.
Makita sa nag-viral nga video ro sangka babaye nga nakatalikod ag ginapuko it sangka eaeaki samtang ginabugbog it iba pang mga babayeng estudyante.
Haeos nagahi-od sa nabatyagan nga sobrang sakit sa likod ro biktima matapos ro pagtinamboe kana.
Indi pa matumod ro eksaktong lokasyon it insidente, apang ginasugid nga natabu raya sa sangka lugar sa C. Laserna St. Kalibo.
Ginasugid nga ro insidente hay sangka initiation ukon welcome rites it sangka fraternity.
Nakita eon man sigon it Kalibo MPS ro video ag presente eon nga gina-imbestigahan ro natabu partikular it Women and Children Protection Desk bangud sa pagpati nga mga minors ro involved.
Ginatumod man ro eskwelahan nga nagapanag-iya it PE uniform nga suksok it pila sa mga eakot sa video nga ginapatihan nga una sa Junior High School level.
Maabu sa mga netizens ro nagkundina sa nasambit nga brutal nga aksyon it mga pamatan-on sa andang isigkatawo ag gin-insister nga owa it lugar sa institusyon ro mga makarondaya nga pagbinatasan.
Engkaso nga matumod ro eskwelahan it nasambit nga mga estudyante, pagasayuron man kon ano ro pagahimuon nga disciplinary action, apang raya hay depende pa sa resulta it ginapatigayon nga imbestigasyon.
Nakikipag-angot eon man ro mga awtoridad sa mga eskwelahan nga ginasudlan it iba pang mga estudyanteng nakita sa video.
Ginpamilit it iba pang netizens nga dapat nga ipaidaeum ro mga estudyante sa psycho-social ag emotional intervention agud nga ma-address ro naeksperyensiyahan nanda nga trauma.
Sa pihak nga parte, ginatinguhaan man it Bombo Radyo nga maboe-an it pahayag ro Department of Education (DepEd-Aklan) angot sa insidente.
