Ginbuksan it Bangko Sentral ng Pilipinas ro currency exchange facility (CEF) para sa mga overseas Filipinos ag andang mga pamilya halin sa Ukraine.
Ginpahayag it BSP nga bilang kaparte it inisyatiba it central bank nga buligan ro mga overseas Filipinos nga naduea-an ag naapektuhan it kinagamo it Russia ag Ukraine rason nga gin aprubahan ro pagbukas it Ukrainian Hryvnia (UAH) CEF.
Pinaagi sa pasilidad, ro mga naga-uli nga overseas Filipino halin sa Ukraine kamana man ro andang mga pamilya hay makapabaylo it andang UAH nga katumbas it indi magsobra sa P20,000 pesos per eligible person.
Ginklaru man it BSP nga ro pasilidad hay magamit sa limitadong tiempo eamang.
Ko Marso, ginmandu it Department of Foreign Affairs ro mandatory repatriation matapos ilunsar it Russia ro pagsalakay sa Ukraine.
