KALIBO, AKLAN — Gin-insister ni dating Iloilo 5th district congressman Niel Tupas, Jr., nga ro Commission on Human Rights (CHR) hay sangka constitutional body kabangdanan nga uwa it poder ro Kongreso nga raya hay i-abolish.
Raya hay kasunod it 119 to 32 nga botohan it House of Representatives nga taw-an it 1,000 pesos nga budget ro CHR sa 2018.
Sa interview it Bombo Radyo, ginpahayag ni Tupas nga dating Chairman it Committee on Justice nga magiging inutil ro ahensiya sa pag-angkon eamang it 1,000 pesos nga pondo.
Suno pa kay Tupas nga bukon pa man raya it pinal bangud magaagi pa sa Senate Committee on Budget.
Eabag sigon sa Konstitusyon ro manabang budget sa CHR nga ro mandato hay magserbeng watchdog kon siin trabaho kara nga sitahon ro gobyerno kon may ginaeabag sa tawhanong kinamatarong it mga pumueoyo
Nagapati si Tupas nga mas dapat pang mataw-an it mas maabong budget ag poder ro ahensiya bangud sa waea-tuo sa makaron nga “war on drugs” ni President Rodrigo Duterte kaparehas it United Nations High Commissioner for Human Rights ag international organizations.
Sa pihak nga parte, uwa sigon sa hurisdiksyon it CHR ro isyu kaangot sa Mamasapano encounter bangud trabaho raya it Ombudsman ag criminal court.
