Kalibo Aklan ——- Ginklaro ni Civil Aviation Authority of the Philippines (CAAP)-Aklan Manager Engr. Eusebio Monserate Jr. nga magapabiling kanselado ro byahe it mga eroplano sa Caticlan ag Kalibo International Airport.
Raya hay maskin nga ginbutang eon it Inter Agency Task Force on Emerging Infectious Disease (IATF-EID) ro bilog nga probinsya it Aklan sa General Enhanced Community Quarantine.
Suno kana, exclusive sa delivery it essential goods ro pagbukas sa mga seaports ag airports.
May kaangtanan kara, uwa pa it schedule flights ro mga airlines companies maskin nga may proposal ro iba kanda nga magabalik ro andang domestic flights sa Mayo 1 apang uman nga napaeawig ro Enhanced Community Quarantine sa Metro Manila ag iba pang probinsya sa pili nga mga rehiyon sa nasyon rason nga siguradong inde eon raya madayon.
Samtang, pag-abot sa International Flights hay may sangka airline company sigon nga nagdihon it proposal nga magabalik ro andang byahe sa buean pa it Oktobre.
Bangud kara, haeos tanan nga tag-iya it airline companies hay nagpabutyag it kalugihan sa andang negosyo tuga it ginapangatubang nga COVID -19 pandemic.
