KALIBO, Aklan—Sunrise to Sunset eon lang ro byahe it mga motorbanca patabok sa isla it Boracay.
Raya hay kasunod it ginpaguwa nga Memorandum angot sa “Guidelines for the operations of Banca’s” it Maritime Industry Authority (MARINA) region VI.
Nakabaehag sa nasambit nga sueundanan nga i-suspinde ro tanan nga operasyon it mga motorbanca pag-abot it gabi-i mag-eowas eamang sa fastcraft nga pwedeng mageayag halin sa Tabon port paagto sa Tambisaan port vice versa.
Tuyo kara nga masiguro ro kaeowasan ag seguridad it mga pasaherong nagasakay it motorbanca eabi eon ro mga turista nga nagabakasyon sa isla.
Dugang pa kara nga kinahangean nga ro tanan nga pasahero hay nakasuksok it life jacket; kapin sa 75% eamang ro authorized capacity it motorbanca; dapat nakatipig ro mga tarpaulin nga nakabutang sa kilid it baroto; ag siguraduhon nga ro byahe it mga raya hay mayad ro paniempo.
Samtang, ginpasiguro ni Lt. Commander Marlowe Acevedo it Philippine Coastguard (PCG)-Aklan nga insigida sanda nga magasunod sa nasambit nga sueundanan.
Sa kamatuoran suno kana hay ginpueong eon nana ro mga myembro it Caticlan‐Boracay Transport Multi‐Purpose Cooperative (CBTMPC) ag mga natungdan nga ahensiya agud nga ipahisayod kanda ro nasambit nga memorandum ag ro insigidang implementasyon kara sa isla it Boracay.
