KALIBO, Aklan–Nagapabilin nga normal ro pagbiyahe it mga pampublikong saeakyan sa bahin it Eastern Terminal sa probinsya it Aklan.
Raya hay bangud owa sanda nagpasakop sa gin-organisa nga sang dominggong transport strike sa bilog nga nasyon umpisa makaron nga adlaw.
Suno kay Richard Flores, jeeney driver nga may biyaheng Camaligan-Kalibo vice versa nga nagkasugot sanda kaibahan ro andang kooperatiba nga obserbahan anay ro sitwasyon makaron nga adlaw.
Posible sigon nga indi anay imaw magbiyahe hin-aga bangud sa kawad-an it pasahero.
Nasayuran nga may pilang eskwelahan nga nagpatuman it online classes bilang alternatibo agud nga mapadayun ro pagtuon it mga estudyante.
Ro ginkasa nga transport strike it pilang grupo hay kaparte it andang panawagan ag pagkontra sa plano it gobyerno nga pag-phase out it traditional jeepney agud nga taw-an it daean it Public Utility Vehicle (PUV) modernization program.
