KALIBO, AKLAN — Sambilog ro cable car system sa mga nakikitang solusyon agud maging hassle-free ro pagsueod-gowa it mga pasahero sa isla it Boracay bisan ano pa ro tiempo.
Sa regular session it Sangguniang Bayan (SB)-Malay, gin proponer it sangka kompaniya ro nasambitang proyekto nga magiging kauna-unahan sa nasyun.
Suno kay Angelo Lazaro, representante it kompaniya nga sa oras ma-finalize ro mga plano ag disenyo may kaangtanan sa iga tukod nga cable cars, maga hueat eamang it tatlo hasta it ap-at nga dag-un ag eubusan eon nga magiging operational ro mga raya.
Ro proyekto sigon hay may nakataeanang P1.5 billion nga inisyal nga pondo kun sa siin maga umpisa raya sa parte it Caticlan hasta sa Cagban port.
Ro cable car hay pwedeng magsakay it 4,000 nga pasahero sa sueod it sang oras nga pabalik-balik nga biyahe.
Gina boebanta nga ap-at nga minuto eamang ro iga buhay kara ag magatawid eon sa isla.
Mag eowas kara, magiging dugang nga atraksiyon pa sigon raya sa mga turista.
