KALIBO, Aklan – – – Patay eon kat makit-an ro sangka caretaker it convention center sa banwa it Malay kahapon.
Ro biktima hay gin kilaea kay Roberto Ortega, 46-anyos, tumandok it Mandaon, Masbate apang, presenteng naga estar sa Sitio Tabon, Brgy. Caticlan, Malay.
Base sa report, nakita eon lang ro biktima nga owa eon it kabuhi sa banyo it nasambitan nga convention center.
Nagagowa sa gin patigayun nga imbestigasyon nga may baeatian ro biktima kun sa siin nakaangkon raya it internal bleeding base sa gin patigayun nga eksaminasyon it Rural Health physician it Malay.
Nakaangkon sigon it hypertension ro biktima.
Nasayuran nga antes ro insidente, nakasueod pa raya sa anang trabaho.
Masami man sigon nga naga reklamo raya it pagsakit it anang tiyan.
Ulihing nakita nga buhi ro biktima ku nagtaliwan nga adlaw it Huwebes.
Sa makaron hay nagapati man ro pamilya it biktima nga owa it foul play sa naging kamatayun ni Ortega.
