KALIBO, Aklan—Gintaw-an it punto ni Tourism Secretary Bernadeth Romulo-Puyat ro “carrying capacity” it isla it Boracay sa ginpatigayong congressional hearing it Committee on Environment and Natural Resources ko nagtaliwan nga adlaw.
Suno kay Sec. Puyat kon inde pag-ipatuman ro nasambitang “carrying capacity” hay uman nga magabalik ro problema it isla ag kanugon eamang ro an-om nga bueang pagpasarado kara.
Dugang pa ni Puyat nga bisan ro mga stakeholders sa Boracay hay gusto eon man nga maipatuman raya sa uman nga pagbukas it Isla sa Oktubre 26 agud ma-sustain ro environmental laws nga uwa nasunod dati.
Striktong igapatuman ro carrying capacity nga 6, 405 eamang nga mga turista ro pagapasugtang makasueod kada adlaw, agud maging “ sustainable” ag mintras-tanto eon nga maging bukas ro Boracay.
Raya man sigon ro hugot nga direktiba ni Pangueong Rodrigo Duterte.
