KALIBO, Aklan—Ginakonsidera makaron it Department of Environment and Natural Resources (DENR) nga madugangan ro carrying capacity sa isla it Boracay agud nga mas maabu nga mga tawo ro makabisita sa sikat nga tourist destination.
Nasayuran nga ro carrying capacity it isla makaron hay kapin sa 19,000 nga katawo kada adlaw apang paga estudyuhan sigon it nasambit nga ahensiya ro nasambit nga butang.
Suno kay DENR Secretary Roy Cimatu nga pagahinyuon nanda ro Ecosystems Research and Development Bureau it ahensiya agud nga tun-an ro numero it mga tawo nga pwedeng makasueod sa boracay matapos nga ginlimitahan ro pagpasueod it mga turista kat ginpaidaeum raya sa rehabilitasyon ko 2018.
Ginpahayag pa ni Cimatu nga kaeabanan sa mga turista kato hay nagatumpok sa frontbeach, apang matapos ro rehabilitasyon hay may mga naga agto eon sa eastern portion ukon sa back beach bangud nga malimpyo eon.
Nauna eon nga ginbansagan nga mabaho ag mahigku ro tubi sa lugar bangud sa mga tubo nga ginaguw-an it waste water.
Mag-eowas sa paglimpyo sa tubi sa baybayon, pila pa sa gintutukan it Boracay Inter-Agency Task Force hay ro pagpatuman it 25+5 meter easement halin sa bibi it baybay ag ro pagpaeapad it karsada.
