KALIBO, Aklan—Ginpasiguro it Boracay Inter-Agency Task Force ukon BIATF nga kapareho it iba pang mga establisimento sa isla, magasunod sa laye ro operasyon it igatukod nga mabahoe nga casino sa bantog nga tourist destination.
Raya hay kasunod it panibag-ong pahayag ni pangueong Rodrigo Duterte nga ginapasugtan eon kara ro pagtukod it casino bangud sa kakueangan it pondo it gobyerno.
Sa opisyal nga pahayag it BIATF, ginpabutyag nanda nga magahimo sanda it nagakaigo nga tikang angot sa pahayag it presidente.
Ro BIATF hay ginapamunuan it department of environment and natural resources ukon DENR ag co-chair kara ro department of the interior and local government ukon DILG ag department of tourism.
Tuyo kara nga mapabilin ro target sa boracay nga padayun nga maprotektahan ro palibot.
Angot kara, ginpadumdum it BIATF ro tanan nga mga negoosyo sa isla nga magsumite it mga nagakaigo nga requirements ag accreditation processes agud nga hugut nga mapatuman nga ro mga compliant eamang ro pagataw-an it nagakaigo nga permits.
