BALITANG ESPESYAL – SPAIN – Maabong animal lovers ro naantig ro baeatygaon sa natabo sa chimpanzee nga si “Natalia” nga pitong buean nga ginkarga ag ginayakap ro anang bag-ong unga nga eapsag apisar nga patay eun.
Nag-unga si Natalia ku nagtaliwan nga Pebrero sa Bioparc Valencia, sa sangka zoo sa Spain.
Apang daywang dominggo eang matapos mag-unga, namatay ro baby chimpanzee.
Apang malisod gid siguro mageong ro sangka ina sa namatay nga unga maging sa pilang klase it mga kasapatan kapareho it chimpanzee.
Apisar nga patay eun abi ro baby chimpanzee, uwa gihapon ginbuhian ni Natalia ro bangkay it anang unga.
Sa sueod it maabong buean, karga gihapon nana ag ginayakap hasta sa naagnas ag naging tue-an eun lang raya.
Makarong Oktubre, ginpahayag it pamunuan it zoo nga medyo habaton eun ni Natalia ro natabo sa anang unga.
Maingat sigon nga ginpanaog ni Natalia sa halimunon ro bangkay it anang unga ag inaywan.
Igto nag-angkon it kahigayunan ro mga zoo keeper nga bue-on ro bangkay it baby chimpanzee para maieubong it mayad.
Sa nagtaliwan nga pitong buean, gin-eksplekar it Bioparc nga ginpabay-an eun lang nanda si Natalia nga buytan ro bangkay it anang unga.
Pagrespeto sigon raya sa natural nga proseso it anang pagluksa.
Nagakatabo man sigon raya sa wild apisar mas mahaba sa normal ro buhay it pagluksa ni Natalia.
Namatayan eun man it unga si Natalia ku 2018 ngani strikto nga ginabantayaan it zoo ro behavior nana.
Gina-eksplekar man sigon sa mga nagabisita sa zoo ro sitwasyon kun makita nanda ro gina-ubra ni Natalia sa namatay nga unga.
