Ginkondena it China ro paggamit it terminong “West Philippine Sea” sa Google Maps, partikular sa parte it Panatag Shoal ukon Scarborough Shoal, nga ginpakita bilang sakop it Pilipinas.
Sa sangka press conference, ginpamilit ni Chinese Foreign Ministry spokesperson Lin Jian nga “South China Sea” ro tamang katawagan, nga ginakilaea sigon it international community ag mga organisasyon kapareho it United Nations.
Samtang, ginkasadya it Armed Forces of the Philippines (AFP) ro representasyon sa web mapping platform, nga gintawag nga pamatuod it pagkilaea it international community sa sovereign rights it Pilipinas.
Suno kay AFP spokesperson Colonel Francel Margareth Padilla, mabahoe nga kontribusyon raya sa pagpatibay it 2016 arbitral ruling it United Nations Convention on the Law of the Sea (UNCLOS).
Ro terminong “West Philippine Sea” hay opisyal nga ginamit katong administrasyon ni dating Pangueong Benigno Aquino III, nga nagdihon it arbitration case sa The Hague para pamaeabagan ro 9-dash line claim it China. Ku 2016, pinaburan it tribunal ro Pilipinas, nga nagpawalang-bisa sa maeawigang maritime claim it China.
