KALIBO, Aklan—Nakipagpueong ro pilang Chinese Embassy officials sa lokal nga gobyerno it Malay, Aklan.
Raya hay kasunod sa pilang kontrobersiya nga ginakaeakutan it mga turistang Chinese samtang nagabakasyon sa isla it Boracay.
Nakipaghinun-anon si Malay Acting Mayor Frolibar Bautista kanday Consul General Bai Tian ag Consul Wang Yi it Chinese Embassy For Culture & Tourism kamana man si Consul General Lou Gang it Chinese Embassy Manila kon sa siin gin-istoryahan sigon ro pagbakasyon it mga dumueoong sa sikat nga isla.
Ginpatigayon ro pueong sa sangka mabahoe nga hotel sa nasambitang isla.
Madumdumang pilang turistang Chinese ro nabutang sa kontrobersiya matapos nga nag-eobong it diaper sa binit it baybayon ag naghugas pa it buli it anang onga sa dagat kamana man ro gin-istoryahan ko kan-o eamang nga pagbandera it andang bandera sa pampublikong lugar nga ko ulihi hay nasayuran nga may permiso halin sa lokal nga gobyerno para sa filming nga sambilog sa requirements sa promotion sa andang nasyon.
Samtang, pormal eon nga napasaalima it Malay PNP ag Philippine Coast Guard ro daywang all-terrain vehicle’s (ATV’s) halin sa People’s Republic of China agud gamiton sa pagpatrolya sa beach area it Boracay.
