SIBALOM, Antique — Nadakpan mismo it mga coaches ag athletes it Aklan delegation ro manakaw nga makapilang beses nga nagpangsueod sa andang billeting quarters sa Sibalom, Antique nga nagtuga it kahadlok, trauma ag kapyerdihan sa anang mga naging biktima.
Suno kay P/Maj. Geremy Ian Magbanua, acting chief of police it Sibalom Municipal Police Station nga ginkilaea ro suspek bilang Children in Conflict with Law ukon CICL nga raya ro anang unang record it pagpanakaw sa Sibalom apang sa San Jose kon sa siin imaw una nga naghalin hay maabo eon ro anang record it pagpanakaw idto nga ro anang modus hay ginabana-bana nana nga may mga event ro anang ginapangbiktima.
Sa pagreview sa CCTV footage, eain ro suksok it suspek kon sa siin posibleng sa sueod eon nana nabuoe ro uniform it Aklan delegation ag nagpakuno-kuno nga athletes nga ko ulihi hay nadakpan mismo imaw sa akto matapos nga nakabantay ag naging alerto ro tanan bangud sa makapilang beses eon sanda nga naduean it kwarta.
Samtang sa pihak kara, ginklaro ni PMaj. Magbanua nga halin it unang adlaw hasta sa pagtapos it Western Visayas Regional Athletic Association (WVRAA) meet 2025 hay may naka-augment nga PNP personnel ag iba pang force multipliers sa billeting quarters it Aklan delegation.
Apang, bukon it tanan hay kilaea it mga atworidad kon sa siin nagabase manlang sanda sa suksok nga ID ag uniform it mga delegado.
Ginklaro dugang nga naging hugot ro andang pagbantay sa adlaw ag gabie kamana man may ga-rounds nga PNP personnel apang naging madanlog ro suspek nga nakakita gihapon it paagi nga nakasueod ag nakapanakaw.
Sa makaron suno kana hay ginaimbestigahan nanda kon may kaibahan ro suspek ag kon imaw man ro responsable sa unang insidente nga naireport sa andang taeatapan.
Ro nasambit nga suspek hay pagapasakaan it Act of Discernment agud nga maskin menor de edad hay pwede mapasakaan it criminal case apang depende sigon sa maguwa nga resulta it discernment nga iga-conduct it Municipal Social Welfare Development Office ukon MSWDO.
