KALIBO, Aklan — Ginbuksan eon ro bag-ong circumferential road sa isla it Boracay.
Ro pagbukas it nasambitang karsada hay ginpangunahan nanday Department of Tourism Secretary Bernadette Romulo-Puyat , DPWH Secretary Mark Villar, DOTr Secretary Arthur Tugade, DENR Secretary Roy Cimatu ag maabong iba pa.
Sa sangka speech, ginpahayag ni Secretary Villar nga ro rehabilitasyon it circumferential road hay sambilog sa mga nagapangunang prayoridad it andang ahensiya sa an-om nga bueang pagpasarado kara.
Sa nasambitang proyekto, ginpaeapad ro karsada sa 12-meters, nagbutang it drainage, gutters, bike lane ag pedestrian sidewalk .
Magiging madali eon sigon ro pagbiyahe sa Puka Beach, sambilog sa pinakasikat nga parte it isla.
Plano man it DPWH nga mag-construct it road network sa Bolabog Beach nga pagatawgong Bolabog boulevard nga magaserbeng alternatibong rota samtang uwa pa natapos ro main road.
Samtang, ginpahayag man ni Environment Secretary Cimatu nga naging madrama ro ginhimong clearing operations bangud may pilang maeagkong establishimento kapin eon ro mga kilaeang resorts ag hotels ro naapektuhan it road widening ag kinahang-ean nga magpatigayon it self-demolition.
