KALIBO, Aklan—Padayon nga igaduso it lokal nga gobyerno it Malay ro proposisyon nga nagasueong sa nasambit nga banwa bilang syudad.
Ro pahayag ni Malay mayor Frolibar Bautista hay kasunod it ika-75 anyos nga foundation day it banwa kon sa siin nagkaeain-eain nga aktibidad ro ginpatigayon it lokal nga gobyerno nga gin-umpisahan ko Hunyo 12 sa mismong adlaw it kahilwayan it nasyon.
Suno kay mayor Bautista, makabig nga sueod eon sa billionaire’s town ro Malay bangud sa ginakita it banwa maghalin sa mga negosyo maghalin sa isla it Boracay ag mainland Malay.
Nasayuran nga mas pang nag-umwad ro ekonomiya it Malay matapos ro pandemic bangud sa pagbalik it negosyo, trabaho, turismo ag maabong iba pa nga nagatao it income sa lokal nga gobyerno.
Sa makaron suno kay mayor Bautista hay maabo ro mga ongoing projects ag mga ginatukod nga negosyo kapin sa isla it Boracay nga ginaeauman nga magatao it mas maabo pang trabaho sa mga Malaynon ag maging sa mga Aklanon sa bilog nga probinsya it Aklan.
