KALIBO, Aklan—Matapos ro haeos tatlong buean nga pagsarado bangud sa epekto it coronavirus disease ukon covid-19 , ginapahauman eun makarun it Commission on Elections (Comelec-Aklan) ro uman nga pagbukas sa pag-isyu it voter’s certification.
Apang, ginklaro kara nga owa pa it nabatun nga memorandum ro ahensya angot kara.
Suno kay Atty. Rommel Benliro , municipal COMELEC Officer sa banwa it kalibo nga sa makarun hay gina-estudyuhan pa nanda ro pilang ka mga polisiya nga pagahimuon.
Samtang, ginpasiguro man kara nga magatao sanda it impormasyon sa publiko engkaso nga magbukas eun ro taeatapan para sa pag-proseso it nasambit nga voters certification.
Nasayuran nga nag-abiso ro pilang ka mga taeatapan it Comelec sa nasyon partikular sa mga lugar nga una sa idaeum it General Community Quarantine ag Modified General Community Quarantine nga magabukas eun raya sa pagtao it voter’s certification.
Raya hay libre eamang para sa mga senior citizen, PWDs, IPs ag ICCs ag sa mga residente it Mindanao.
