KALIBO, Aklan—Ginpasakaan it Commission on Elections (Comelec) it reklamong cyber libel ro sangka vice mayoral bet sa Isabela province angot sa ginpakigbahin nga video sa anang social media accout nga ginpakita kon paano sigon ma-hack ro mga automated counting machine.
Suno kay Crispin Raymund Gerardo, tagapaghambae it Comelec-Aklan nga insigidang nag-aksyon ro komisyon bangud sa nagadaea raya it mis-information sa publiko kamana man nagasamad sa kredibibilad it tagdumaeahan it eleksyon.
Base sa mga nagtaliwan nga automated election nga gin-umpisahan pa kato nga 2010, ginpamalibaran ni Gerardo nga sarang masueod it mga hacker ro system it vote counting machine ukon VCM nga ginahueogan it mga balota ag direktang mahuyap ro mga boto it kandidato.
Dugang pa kara nga mapeligro ro mga ginbuhian nga pamisaea it nasambit nga kandidato kon sa siin matsa ginakondisyon kara ro paino-ino it pumueoyo nga sarang madaya ro paaeabuton nga eleksyon.
Suno pa kay Gerardo, ro ginhimo it kandidato hay pagmantsa sa bilog nga proseso ag ginahalitan kara ro integridad it igapatigayon nga eleksyon.
Nasayuran nga ginpahayag kara nga may una sigon nga backdoor programs nga sarang mag-override sa Automated Counting Machines.
Mag-eowas sa reklamo cyberlibel, pagapasakaan man ro kandidato it disqualification case, disbarment case sa Integrated Bar of the Philippines (IBP), ag kaso agud mabawi ro anang lisensiya sa Professional Regulation Commission (PRC).
