Aklan——-Sigidas makaron ro construction it COVID-19 laboratory sa compound mismo it Aklan Provincial Hospital.
Raya hay sambilog sa handom it gobyerno probinsyal nga makaangkon it kaugalingon nga testing laboratory ro probinsya agud nga indi eon kinahang-ean nga daehon ro mga swab sample it suspected COVID-19 patient sa Western Visayas Medical Center, Department of Pathology sa syduad it Iloilo, ro sub-national laboratory accredited it Department of Health (DOH)-Research Institute for Tropical Medicine (RITM).
Suno kay Provincial Health Officer I Dr. Cornelio Cuatchon Jr., ginatinguhaan eagi nga matapos ro nasambit nga pasilidad agud nga makabueo it license to operate sa DOH sa sueod it daywang buean kon sa siin target nga mabuksan ro molecular laboratory antes matapos ro buean it Hulyo.
Una kara, may daywang ka GeneExpert machines nga gindonar sa gobyerno probinsyal ro Philippine Business for Social Progress para sa madaliang pagdetect it coronavirus infection.
Mag-eowas kara, nagbakae man ro Provincial Government it Real Time-Polymerase Chain Reaction (RT-PCR) Machine nga sambilog sa mga importanteng kinahang-eanon ag pagagamiton para sa ginapatindog nga kaugalingong testing laboratory sa probinsya it Aklan.
