NUMANCIA, Aklan – Padayun nga ginatugis it kapulisan ro sangka security guard matapos nga eab-on it makapilang beses ro naka-away nga construction worker sa katung-anan it selebrasyon it kapistahan sa Barangay Bulwang, Numancia, bandang alas-11:15 gabi-i it Huwebes, Mayo 23, 2024.
Suno kay P/Cpl. Rex Retentoy it Numancia Municipal Police Station nga insigidang nagpaeagiw ro suspek nga si Mark Nervar, 30-anyos, ag residente it nasambit nga lugar matapos nga maeabu ro biktimang si Willy Borja, 41-anyos ag residente it Brgy. Tambuan, Malinao.
Base sa imbestigasyon, samtang nakikipag-inuman ro biktima sa anang mga katrabaho sa andang barracks kat gulping nag-abot ro suspek nga hilong eon ag ginkompronta si Borja rason nga nakaangkon it mainitan nga diskusyon sa indi masayuran nga dahilan.
Bangud kara, ginbayo it biktima ro suspek rason nga nagbo-oe raya it sanduko ag gin-eabu si Borja nga tinamaan sa anang waea nga ueo, waea nga abaga ag waea nga a insigidang gindaea ro biktima sa ospital nga makaron hay nagapamayad eon sa mga lastro nga naagum samtang ro suspek hay nagpaeagiw.
Pabor sigon nga makipag-areglo ro biktima sa kundisyon nga sabton it suspek ro tanan nga gastos kara sa ospital.
