MADALAG, Aklan—Patay ro sangka construction worker matapos nga ginbuno it anang katrabaho sa Brgy. Catabana sa banwa it Madalag.
Sa impormasyon nga nabuoe it Bombo Radyo Kalibo, ginkilaea ro biktima nga si Rommel Biñares, sa legal nga edad ag residente it Roxas City, Capiz.
Samtang, ro suspek mat-a hay ginkilaea nga si Mathew Samillano, sa legal nga edad ag residente it probinsya it Antique.
Sa inisyal nga imbestigasyon it Madalag Municipal Police Station base sa mga pahayag it andang ginpang-imbitahan nga indibidwal, nagsaeampitan sigon ro magkatrabaho nga magpaligos sa suba hasta sa nag-inuman.
Kat parehong una eon sa idaeom it impluwensya it aeak ro daywa, posibleng may nagpatunga sa mga raya nga mainitan nga diskusyon hasta sa umabot sa punto nga nabun-an it suspek ro nasambit nga biktima it makaywang beses sa anang dughan nga gintunaan it anang hinali nga kamatayon.
Matapos ro insidente hay nakaeaong pa sigon ro suspek sa iba pa nanda nga kaibahan nga maeagyo raya bangud sa nakabuno imaw rason nga padayon pa raya nga ginatugis it pulisya.
Ro nasambit nga mga construction workers hay naga-construct it poultry farm sa nasambit nga lugar kon sa siin may kahadlok ro mga raya para sa andang kaeowasan bangud sa base balikan sanda it nasambit nga suspek.
Ro insidente hay padayon pang ginaimbestigahan it Madalag PNP Station.
