KALIBO, Aklan — Aprubado eon sa committee level ro conversion it provincial hospital bilang sangka level 3 hospital.
Engkaso nga eubusan nga maging laye, pagatawgon raya nga Dr. Rafael S. Tumbukon Regional Medical Center.
Sa anang sponsorship speech, ginpahayag ni Aklan 1st District Congressman Jess Marquez nga sa pag-upgrade it ospital nga may 500-bed capacity, owa eamang kara ginapataas ro ikasarang nga magbaton it mas maabu nga pasyente, kundi pagabutangan man raya it mga makabag-o ag espesyal nga pasilidad nga makasabat sa national and international standards.
Base sa monthly statistical reports umpisa Enero hasta Hunyo 2025 nga ginsumite ni Dr. Cornelio Cuachon, Chief of Hospital, naga-eampas eon sa gintaeana nga bed capacity ro operasyon kara nga naga-abot sa average nga 137.51%.
Ginapakita sigon sa nasambit nga datos nga mabahoe ro pagkinahangean it mga pumueuyu sa nasambit nga institusyon.
Bangud kara, ginapanan-aw ro pag-angkon it expansion agud nga masabat ro nagataas nga demand para sa dekalidad nga serbisyong pang-ikamayad nga eawas.
Ro nasambit nga proposisyon hay bukon eamang it angot sa expansion kundi nga masiguro man ro ikamayad nga eawas ag paeaabuton it mga pumueuyu.
Raya hay angot suno kana sa pagpasiguro nga owa it Akeanon ag owa it Pilipino ro kinahangean nga mag-antus bangud sa kakueangan it bastante nga medical facilities.
Apela ni Cong. Marquez nga padayun nga bantayan ro pagsueong it nasambit nga hagna bangud nga eubus nga kinahangean ro may kalidad nga serbisyong pang-ikamayad nga eawas sa tanan.
