KALIBO, Aklan–Una sa eowas nga kahimtangan ro tanan nga mga crew members it sangka cargo ship nga sumadsad, Biyernes it gabi-i sa baybayong sakop it Barangay Polo, New Washington, Aklan.
Ro nasambit nga maritime incident kun sa siin eakot ro domestic vessel nga LCT Golden Bella nga may sakay nga 14 nga crew members kaibahan ro kapitan hay insigidang ginrespondehan it Philippine Coast Guard (PCG), Philippine National Police ag mga opisyal it nasambit nga barangay.
Suno kay Chief Mate Hector Mendoza Calo, naghalin ro andang barko sa port it Danao City nga owa it anuman nga karga ag paagto kunta sa Batangas port.
Nag-agi eamang sigon sanda sa Aklan apang naka-encounter it subasko nga owa nasarangan it andang makina.
Bangud sa mabahoe nga humbak ag mabaskog nga hangin , inapok sanda sa bibi it baybay.
Ginpahayag dugang nga nauna sanda nga nag-angkorahe sa parte it bakhaw , apang raya hay nautod hasta nga inanud sanda sa nasambit nga lugar.
Ro insidente hay ginkaguluhan it mga residente bangud nga raya sigon ro unang kahigayunan nga may gindagsa nga barko sa andang lugar.
Kumpiyansa si Calo nga engkaso nga maka-angkon it high tide hay uman sanda nga maka-eayag.
