NATIONAL News — Naglista ro Philippine Ports Authorty (PPA) it haeos 61.9 percent nga pagtaas sa mga cruise passenger arrival ko 2024 nga nag-abot sa 142,574 nga mga pasahero.
Suno sa PPA, raya hay sangka mabahoe nga pagtaas halin sa 88,080 ko 2023.
Ginpahayag it ports authority nga nagamarka it pinakamataas nga numero it post-pandemic para sa nasyon ag ro mga proyekto it ahensya hay nagapadayun sa pag-umwad makaron nga 2025 nga ginaeauman nga nga maga-abot sa 185,000 nga mga pasahero sa cruise, sangka 29.8 percent nga pagtaas halin ko nagtaliwan nga dag-on.
Samtang, agud nga suportahan ro naga-umwad nga cuise tourism industry, ro PPA hay naga-invest sa bag-o ag gin-ayos nga imprastraktura it pantalan.
Kaibahan sa mga mataeupangdan nga proyekto nga ginapatindugan it mga nakataeana nga cruise terminal hay makita sa Coron, Aklan, ag Camiguin, kamana man ro sangka cruise ship port sa Puerto Galera, Oriental Mindoro, nga may gintaeana eon nga pagsumite it bid para sa Pebrero 5, 2025.
Mag-eowas pa kara, ko 2024, natapos eon ro Jubang Port Cruise Ship Terminal sa Dapa, Surigao del Norte.
Sa nasambit nga mga pag-umwad, tuyo it PPA nga mas pang pabaskugon ro kahimtangan it Pilipinas bilang sangka nagapangunang destinasyon it cruise, pabaskugon ro mga lokal nga ekonomiya, ag ipakita ro nagapangunang mga atraksyong pangturista it nasyon sa bilog nga kalibutan.
