KALIBO, Aklan—Mas pang ginpahabaan ro ginapatuman nga curfew hours sa banwa it Altavas.
Suno kay Altavas mayor Denny Refol Jr. nga ro nasambitang tikang hay ginbilog it Municipal Inter-agency Task Force ukon MIATF matapos nga makalista it 7 ka mga panibag-ong kaso it coronavirus disease 2019 ukon covid sa 21 ka mga indibidwal nga ginpaidaeum sa swab test.
Sandig sa ginpaguwa nga Executive Order No. 012 series of 2021 ko adlaw it Miyerkules, May 19, 2021 hay maga-umpisa eun it alas 8:00 it gabi-e hasta alas 5:00 it aga-aga ro ginapatuman nga curfew hour sa nasambitan nga banwa.
Samtang, ginpatag-uran man sigon ro operating hours it andang public market ag hugot nga igapatuman ro pagsuksok it face mask ag face shield ag magapatuman man it “one entry, one exit” poicy.
Mag-eowas kara, pagalimitahan man ro mga gatherings kapareho it namatyan nga imaw sigon ro ginapanan-aw nga rason it pagkalhit it deadly virus.
Bangud kara, ginalimitahan eamang ro paghaya it patay it hasta sa sang dominggo ag ro mga pamilya eamang it namatyan ro pwedeng magbisita.
Sa pihak nga parte, ginkalipay nga ibalita ni mayor Refol nga magapatigayon man sanda it vaccination roll out sa andang A2 priority.
Raya hay matapos nga makabo-oe it 90% nga vaccination roll out sa ginpatigayon nga A1 category sa mga frontliners.
Nasayuran nga ro una sa A2 priority hay ro mga senior citizens nga nakataeanang pagaturukan it AstraZeneca vaccine.
