KALIBO, Aklan—Ginapatag-uran it lokal nga gobyerno it Malay ro oras it ginapatuman nga curfew sa nasambit nga banwa matapos nga ginpasugtan eon ro lokal nga turista nga taga Western Visayas nga makabakasyon sa isla it Boracay kamana man nga ginduea eon ro age restrictions.
Suno kay Malay mayor Frolibar Bautista nga aprubado eon raya it local inter-agency task force ag gina-baeay eon sigon ni Aklan Governor Florencio Miraflores ro executive order para kara.
Ginpahayag nga halin sa naunang ginpatuman nga 9 p.m. hasta 5 a.m. nga curfew hours, pagabayluhan raya it 11 p.m. hasta 4 a.m.
Ginpaathag it alkalde, tuyo kara nga mataw-an it kahigayunan ro mga turista nga maka-enjoy sa andang bakasyon kamana man ro mga bars, restaurants ag iba pang kaean-an nga makapag-operate it mas mahabang oras.
Dugang pa kara nga makaangkon it mahabang oras ro mga pampasaherong motorbanca nga makapahaum sa andang operasyon eabi pa ag alas-6 it agahon ro andang first trip.
Ginklaru dugang nga ro schedule it pagpaligos sa baybayon hay magapabilin sa 6 am to 6 pm agud nga masiguro nga naka-rehistro ro mga nagapaligos para sa madali nga contact tracing.
Ro pagbawi sa age restrictions hay para eamang sa mga turista ag bukon it sa mga residente sandig sa approval it Department of Tourism.
