KALIBO, Aklan—Umpisa hindunang gabi-i it Biyernes, ginbawasan pa it tatlong oras ro dating ginapatuman nga curfew hours sa isla it Boracay.
Sa advisory nga ginpaguwa it lokal nga gobyerno it Malay, halin sa dating alas-10:00 it gabi-i hasta alas-5:00 it agahon hay gin-obra raya nga 12:00 it tungang gabi-i hasta alas 4:00 it agahon.
Apang ro mga barangay sa mainland Malay hay magasunod gihapon sa ginapatuman nga curfew hours it lokal nga gobyerno it Aklan nga alas-9:00 it gabi-i hasta alas-4:00 it agahon.
Ginpatag-od ro curfew sa isla agud nga mas pang mataw-an it mahabang oras ro mga turista nga magwarang ag ma-enjoy ro andang natungdan nga mga bakasyon.
Sa pihak nga parte, nagpadumdum pulisya sa publiko nga maskin nga ginhaeugaan eon ro travel restrictions, hugut sa gihapon ro andang pagbantay sa mga naga-eabag sa curfew.
Suno kay Lt. Col. Don Dicksie De Dios, hepe it Malay Municipal Police Station, masobra sa 43 nga mga turista ro andang nadakpan nga naga-eabag sa curfew nga kaabuan hay hilong nga halin sa mga bar.
Ro mga violators hay gin-isyuhan it citation ticket nga may multang 2,500 pesos.
Knahangean sigon nanda nga mag instrikto samtang nagapabilin ro paeag it Covid 19 agud nga indi eon mauman ro pag-lockdown sa pilang lugar sa Boracay.
Ginapahauman eon man sigon nanda ro pagbuhos it mga turista sa oras nga boe-on eon ro RT-PCR test sa mga bakunadong turista.
Sa makaron hay naga-average sa 1,000 hasta 1,500 nga turista kada adlaw ro nagasueod sa isla.
