KALIBO, Aklan—Nagpanindugan si dating Aklan Congresswoman Billie Calizo-Quimpo nga indi kinahangean it isla it Boracay ro ginaduso nga kontrobersiyal nga Boracay Island Development Authority ukon BIDA bill bilang sangka Government-Owned and Controlled Corporation (GOCC).
Suno kana nga pagasuportahan nanda raya kon para sa regulatory purposes, apang bukon it government-controlled body.
Ginpaathag kara nga tuyo it GOCC nga maghimo it maabu nga mga investments, apang bukon eon raya it aplikabli sa Boracay bangud nga masyado eon nga over-developed.
Raya ro rason suno kana kon ham-an nga ginpasarado ni pangueong Rodrigo Duterte ro isla ko nagtaliwan nga 2018 agud nga ipaidaeum sa rehabilitasyon.
Kapareho it ginasinggitan it LGU-Malay, ginpahayag ni Calizo-Quimpo nga ro BIDA bill bilang GOCC hay hayagan nga pag-eabag sa local government code.
Mas paborabli sigon ro ginaproponer nga i-extend eon lang it sang dag-on ro termino it Boracay Inter-Agency Task Force (BIATF) nga imaw makaron ro nagadumaea sa mga ginapatigayon nga rehabilitasyon sa Boracay.
Palaisipan sigon para kana ro motibo it mga nagaduso it nasambit nga bill sa pihak nga haeos tanan nga mga akeanon hay nagakontra kara kaibahan ro iba pang mga natungdan nga ahensiya it gobyerno.
Madumduman nga nauna eon nga gin aprubahan it committee on government enterprise and privatization ag committee on good local government sa Kongreso ro BIDA Bill nga ipaidaeum sa GOCC.
Sa pihak nga parte, nagpamalibad anay nga magtau it komento si dating Congresswoman Billie angot sa anang plano sa maabot nga eleksyon sa 2022.
