KALIBO, Aklan — Mas ginataw-an it prayoridad makaron ni dating 2nd District Congressman Ted Haresco Jr., ro anang mga negosyo kumpara sa politika.
Raya ro ginpahayag ni Nabas Mayor James Solanoy kasunod it andang pagkita kan-o eamang.
Suno kana nga mas gusto it dating kongresista nga mag-lie-low anay sa pulitika ag owa pa it plano nga uman nga magpa-ilihir sa nagahilapit nga 2028 elections.
Mas healthy sigon tan-awon makaron si Haresco nga maeayo sa sangag it politika ag stress.
Ginklaru man ni Mayor Solanoy nga pagpangamusta eamang ro andang pakikipagkita sa dating kongresista nga ginakabig nana nga sambilog sa anang mga suod nga amigo .
Sa pihak nga parte, plano ni Mayor Solanoy nga pagahimayon ro P10-milyon nga gintaeana nga pondo sa andang banwa sa idaeum it Local Government Support Fund.
Ro P5 milyon hay igataeana sigon nanda pagpa-ayos it farm-to-market road sa Brgy. Buenavista samtang ro nabilin nga P5-milyon hay iga-alokar sa pagbakae it bugas para sa igapanupod nga tig-60 kilos it bugas sa kada pamilya sandig sa mandu ni President Marcos Jr., sa tunga it ginapangatubang nga krisis sa langis.
