KALIBO, Aklan — Eubusan eon nga nakilaea it Special Investigation Task Group “Dayang” ro gunman sa pagpatay sa 89-anyos nga peryodistang si Juan “Johnny” Dayang ko Martes it gabi-i, Abril 29, 2025.
Ginkilaea ni PRO Regional Director PBGen. Jack Wanky ro suspek nga si Kim Wency Bayang Antonio, alyas BB Boy, 39, dating gwardiya ag residente it Bacoor Cavite, apang tumandok it Balugo Valencia, Negros Oriental.
Pinaagi sa backtracking, natumod ro anang pagkatawo matapos nga mausoy ro lodging house nga gina-alegar nga anang gin-istaran umpisa ko Abril 3 sa banwa it Kalibo.
Ginpahayag dugang nga tatlong beses man imaw nga nag-renta it nagkaeain-eain nga motorsiklo nga gingamit sa anang pag-surveillance sa baeay ni Dayang sa Villa Salvacion, Brgy. Andagao, Kalibo.
Ginkumpirma nga dati imaw nga nadakpan sa sangka drug buy-bust operation sa Pasig, City ko Mayo 4, 2021.
Ginpahayag pa ni Wanky nga sa oras nga madakpan ro suspek hay dikara pa eamang masayuran kon pulitika gid man ro motibo sa pagpatay.
Dugang pa it SITG nga mabahoe ro andang pagpati nga nakaguwa eon sa Western Visayas ro suspek.
Sa makaron hay padayun pa nga ginatumod sa sangka security agency kon aktibo pa nanda nga empleyado ro suspek base sa nakita nana nga identification card.
Sa pihak nga parte, nagtanyag it P500,000 nga reward money ro Aklan provincial government ag LGU-Kalibo para sa sin-o man nga makatau it impormasyon sa kapulisan para sa ikadakop it suspek.
Madumduman nga ginbaril it maka-tatlong beses ro biktima samtang nagatan-aw it telebisyon sa sueod it anang baeay.
Si Dayang hay ginhatud sa anang ulihing paeahuwayan, adlaw it Miyerkules, Mayo 7, sa Manila Memorial Park.
Padayun nga nagasinggitan it hustisya ro anang pamilya ag media community sa Aklan ag bilog nga nasyon.
