KALIBO, AKLAN – – – Arestado ro dating konsehal ag makaron hay security officer it LGU Malay sa ginkasa nga drug buy bust operation sa isla it Boracay sa pagpanguna it Aklan Provincial Drug Enforcement Unit at Malay PNP.
Gin kumpirma ni PDEU Chief Police Senior Inspector Frenzy Andrade ro suspek nga si Lenny Sacapaño, residente it Brgy. Balabag, Boracay.
Nabo-oe sa suspect ro sangka sachet it suspected shabu pinaagi sa sangka poseur buyer ag marked money nga 1,000.00 pesos.
Dugang nga nabo-oe sa anang possession ag control ro limang ka mga sachets sa gin patigayun kana nga body search kamana man it masobra sa 100,000.00 pesos nga kwarta nga nakabutang sa bag it suspect.
Posibli man sigon nga naga paubos eon ro stock ni Sacapaño base sa andang source.
Gin klaro ni Andrade nga bukon it High Value Target si Sacapaño apang, mabuhay eon nga sa watchlists it otoridad rason nga maidid nga gina monitor.
Sakop sigon it anang operasyon it illegal drugs ro banwa it Malay partikular eon ro isla it Boracay.
Kumpirmado man nga sambilog raya sa mga drug surenderees sa Oplan Tokhang it Malay PNP ku nagtaliwan nga dag-un.
Sa makaron hay nakakulong eon ro suspect ag naga pangatubang it kaso bangud sa pag-eabag sa RA 9165 ukon Comprehensive Dangerous Drugs Act of 2002.
