KALIBO Aklan–Magapangatubang sa reklamong pag-eabag sa republic act 9165 ukon comprehensive dangerous drugs act of 2002 ro sangka 42 anyos nga construction worker matapos nga maaresto sa ginpatigayon nga drug buy-bust operation bandang alas-12:28 kaina it hapon sa F. Quimpo, Corner Pastrana Sts. Brgy. Poblacion, Kalibo.
Ginpatigayon it Philippine Drug Enforcement Unit ukon PDEU ag Kalibo Municipal Police Station ro operasyon sa nasambit nga lugar nga naging resulta sa pagkaaresto sa suspek nga si John Kay Quimpo Pallada, alyas Bugoy ag residente it Sto Niño Village Poblacion Kalibo.
Si Pallada hay naboe-an it pulisya it tatlong plastic sachet nga may sueod nga ginadudahan nga shabu.
Narekober man it pulisya ro P2,500 nga gingamit bilang buy-bust money ag sangka cellphone nga de-keypad nga ginapatihan nga ginagamit sa anang transaksyon.d
Daywa sa sachet it ginadudahan nga shabu hay narekober sa anang boesa sa ginpatigayon nga body search.
Bangud kara, magapangatubang imaw sa reklamong pag-eabag sa sec. 5 ag 11 it RA 9165 ukon selling ag possession.
Kasunod it pagka-aresto kana hay ginbasahan imaw it mga otoridad it miranda rights ag anti-torture law.
Sa pihak nga parte, ginpahayag ni Kagawad Kim Melgarejo it Barangay Poblacion Kalibo nga haeos pilang buean man nga ginsurveillance ro suspek antes nga ginkasa ro operasyon
Base sa intelligence report, imaw ro naga supply it shabu iya sa banwa it Kalibo.
Nasayuran nga dati imaw nga nagabulig it pagmatansa it baboy sa Oyo torong St. apang bangud sa ASF outbreak hay nagsaylo imaw it trabaho bilang construction worker.
Samtang, gin aku ni Pallada sa Bombo Kalibo nga ku syang adlaw ro anang ulihing paggamit it shabu , apang gin-insister kara nga ro mga narekober kana makaron it kapulisan hay bukon it ana ag planted eamang.
Bukon man sigon imaw it drug surenderee bangud nga idtu imaw sa Metro Manila ko rato nga mga tiempo.