NATIONAL News — Natugyan eon sa kustodiya it International Criminal Court (ICC) si former President Rodrigo Roa Duterte kasunod it anang pag-abot sa Netherlands kabi-i.
Sais minutos antes ro alas 12 it tungang-gabi-i (oras sa Pilipinas) kat nagtugpa ro eroplano nga ginasakyan ni Duterte sa Rotterdam, ro pinakamaeapit nga airport sa The Hague kun sa siin nahatamtang ro international tribunal.
Pasado alas 3 it aga-aga (PST) kat nag-abot ro convoy sakay si Duterte sa Scheveningen detention facility.
Maabu nga mga Pilipino ag Duterte supporters ro naghueat sa guwa it pasilidad kun sa siin ro iba kanda hay nagasinggitan nga ibalik ro former president sa Pilipinas.
Mismo ro korte ro nagkumpirma sa andang website nga gin-surrender eon kanda si Duterte kasunod it warrant of arrest nga gin-serbe bangud sa mga kaso nga “murder” nga makabig suno sa ICC nga “crime against humanity.”
“Mr Rodrigo Roa Duterte… was surrendered to the custody of the International Criminal Court,” suno sa ICC. “He was arrested by the authorities of the Republic of the Philippines in accordance with an arrest warrant issued… for charges of murder as a crime against humanity.”
Sa video nga na-post sa official facebook page ni Duterte antes nag-abot sa The Hague, ginpasalig kara sa anang mga supporters nga mayad ro anang kondisyon ag owa it dapat nga kabaeak-an.
Uman kara nga gin-insister nga owa it dapat nga kabaeak-an ro mga pulis ag militar nga anang ginpangsugo bangud imaw ro magapanabat ag pagaproteksyunan nana ro mga raya.
“Okay lang ako. Do not worry, and I think this has something to do with the law and order noon. At sinasabi ko naman sa mga pulis, military na, trabaho kayo at ako ang managot. So, ito na nga,” pahayag ni Duterte.
“For all of the whatever happened in the past, ako na ‘yung nag-front sa ating law enforcement pati military. Sinabi ko na, I will protect you and I will… ako ang managot sa lahat,” dugang pa ni Duterte.
Ginpahayag dugang nga padayon imaw nga magaserbe sa nasyon, bisan ano pa kaeawig ro legal proceedings.
“This will be a long, legal proceedings but I say to you, I will continue to serve my country and so be it kung ganun ang destiny ko. Salamat,” kaparte pa it anang statement.
Kun basehan ro ICC, may hearing pa nga i-schedule antes ro initial appearance it former president sa international tribunal.
Nauna kara, nagpaguwa it arrest warrant ro International Criminal Court (ICC) kontra kay Duterte.
Nasayuran nga si Duterte hay nagapangatubang sa posibleng kasong “crime against humanity” bangud sa brutal nga anti-narcotics campaign it anang administrasyon samtang presidente ag sa extrajudicial killings sa Davao City kat mayor pa imaw it siyudad.
