KALIBO, Aklan—Matsa ginlampaso it Republican presidential nominee ag dating U.S. President Donald Trump si Democratic presidential nominee ag U.S. Vice President Kamala Harris sa andang pagsabak sa unang presidential debate makaron nga adlaw sa estado it Philadelphia.
Suno kay Bombo International Correspondent Pinoy Gonzales it Texas, USA nga haeos indi makadepensa ro 59-anyos nga si Harris sa pagkontra it 78-anyos nga si Trump sa anang ginaduso nga indi makaangkon it limitasyon ro abortion, mga patakaran sa illegal immigration ag ro pagtaas it mga nagapangunang baeak-eon.
Ginpuna man ni Gonzales ro pagiging bias it ABC news nga nagpatigayon it debate nga maka-democrats suno kana, apang bangud sa kamayad ni Trump nga magdepensa hay naeusutan nana ro mga banat it anang kontra.
Nagapati man imaw nga engkaso nga makabalik si Trump bilang presidente it Amerika hay maduea ro mga nagakatabu nga giyera ag maskin ro gulo sa tunga it Pilipinas ag China sa gina-agawan nga teritoryo sa West Philippine Sea.
Sa pihak nga parte, sa ginpatigayon nga debate, ginkwestiyon ni Harris kon nagakabagay pa si Trump nga magbalik sa pwesto bangud sa anang mga ginapangatubang nga kaso.
Ginaeauman nga magiging hugut ro engkwentruhanay it daywa sa maabot nga US presidential election sa Nobyembre 5.
Puntirya sigon it daywang kandidato nga maeagas ro importanteng swing voters sa gin-abangan nga presidential debate.
Ginpahayag ni Gonzales nga nakadepende eon makaron sa mga voters ro pagbinag-binag kon sin-o ro andang pagasuportahan bangud nga ro nasambit nga debate sigon hay posibleng magtau kay Harris it kahigayunan agud nga madugangan ro anang mga tagasuporta apang pwede man nga makabawas kon owa nagustuhan ro anang performance.
Gintalakay it daywang kandidato ro angot sa mga isyu kapareho it immigration, foreign policy ag healthcare, apang pareho nga owa masyadong nataw-an it atensyon ro mga policy details.
