KALIBO, Aklan—Patay ro daywang katawo matapos nga maimbolbar sa aksidente ro parehong behikulo nga andang ginasakyan, bandang alas-3:30 it aga-aga, adlaw it Dominggo sa may bahin it diversion road sakop it Brgy. Tigayon, Kalibo.
Ro nasambit nga aksidente hay ginakaeakipan it Elf truck van nga ginamaneho ni Ron Lidivas, sa legal nga edad, residente it syudad it Iloilo sakay ro daywang ka pahinante nga sanday Fernan Algarni, 21-anyos ag Jonjie Tayco, 38-anyos ag parehong residente it Brgy. Camanci Norte, Numancia samtang ro refrigerated van hay ginamaneho ni Kristian Hibanada, 29-anyos sakay ro daywang ka pahinante nga sanday Carl Hibanada, 19-anyos ag Anecito Hibanada, 27-anyos ag parehong residente it probinsya it Antique kon sa siin nagsalpukan ro mga raya sa nasambit nga lugar.
Sa inisyal nga imbestigasyon it Kalibo Municipal Police Station, halin sa banwa it Kalibo paagto sa direksyon it Banga ro elf truck, samtang patabok mat-a sa national highway halin sa diversion road ro refrigerated van nga naghalin sa Brgy. Nalook paagto kunta sa banwa it Lezo kat gulpi raya nga sumunggab sa elf truck.
Bangud sa mabaskog nga impact it pagkasunggab, bumaliskad ro sambilog kanda ag parehong nakaangkon it nagkaeain-eain nga kasamaran ro magtimbang nga behikulo kamana man nagresulta sa pagkamatay it driver it refrigerated van ag pahinante it elf truck van.
Samtang, ro iba pang sakay it parehong behikulo hay padayon nga ginabueong sa Aklan provincial hospital.
Sa makaron, nagapadayon pa ro imbestigasyon it pulisya sa nasambit nga aksidente.
